كيف توزع ميزانية مشروع الدواجن بطريقة ذكية وتقلل الخسائر؟

كيف توزع قروشك في مشروع الدواجن؟ أغلب المربين الجدد بغلطوا نفس الغلطة ويشترو كتاكيت وأعلاف بكل القروش العندهم، ويخلو جيبهم فاضي من غير سيولة.. لكن في الحقيقة دا أول طريق للخسارة❗️ والدواجن ما بتستناك لو بكرة يظهر مرض، العلف يخلص فجأة، الكهرباء تقطع، أو لمبات التدفئة خربت. وأنت لو ماعندك كاش جاهز... الدورة كلها ح تقيف وأنت بتتفرج. ودا نموذج لطريقة التوزيع: 💰 40% علف المحرك الرئيسي للمشروع لو انتهى كل شي حيقيف.. وراعي انك تشتري للدورة كاملة ما تشتري بالشهر. 💰 20% كتاكيت ركز على إنه جودة الكتكوت أهم من العددية. 💰 10% أدوية وتحصينات. 💰 10% تجهيزات مكان وصيانة سقايات، علافات، لمبات، نشارة،...الخ كل الحاجات الصغيرة دي لو عطلت بتبوظ ليك الدورة كاملة. 💰 10% استشارات وتدريب ساعة مع مختص او اشتراك في ورشة بوفر عليك شهور من التجارب للفاشلة. 💰 10% مبلغ احتياطي للطوارئ دي أهم حاجة في المشروع، وبتخليك قادر تتصرف لو حصل اي ظرف. وأنت لو ح تبدأ مشروع ح توزع قروشك بين الحاجات المهمة ولا تبدأ طوالي؟